திருநெல்வேலி மாவட்டத்தில் நடைபெற்ற முக்கிய குற்றவியல் வழக்குகளில் சிறப்பான விசாரணை மேற்கொண்டு, குற்றவாளிகளுக்கு நீதிமன்றத்தின் மூலம் தண்டனை பெற்றுத் தந்த காவல்துறையினருக்கு பாராட்டுச் சான்றிதழ் வழங்கி கௌரவிக்கும் நிகழ்ச்சி நடைபெற்றது.
இந்த நிகழ்வில், காவல்துறை துணைத் தலைவர் முனைவர் இரா. திருநாவுக்கரசு, இ.கா.ப. அவர்கள் கலந்து கொண்டு, சிறப்பாக பணியாற்றிய காவல்துறை அதிகாரிகள் மற்றும் காவலர்களுக்கு பாராட்டுச் சான்றிதழ்களை வழங்கி வாழ்த்தினார்.
நிகழ்ச்சியில் பேசிய அவர், குற்றச் சம்பவங்கள் தொடர்பாக அறிவியல் முறையிலான விசாரணை, துல்லியமான ஆதாரங்களைச் சேகரித்தல், சாட்சிகளை முறையாக நீதிமன்றத்தில் முன்னிலைப்படுத்துதல் உள்ளிட்ட பணிகளில் காவல்துறையினர் காட்டிய அர்ப்பணிப்பு பாராட்டத்தக்கது என்று தெரிவித்தார்.
மேலும், குற்றவாளிகளுக்கு நீதிமன்றத்தின் மூலம் தண்டனை பெற்றுத் தருவது மட்டுமே காவல்துறையின் வெற்றியாக இல்லாமல், பொதுமக்களிடையே சட்டத்தின் மீது நம்பிக்கையை அதிகரிக்கும் முக்கிய நடவடிக்கையாகும் என்றும் அவர் குறிப்பிட்டார்.
சமூகத்தில் குற்றங்களை கட்டுப்படுத்தவும், சட்டம்-ஒழுங்கை நிலைநிறுத்தவும் காவல்துறையினர் நேர்மையுடனும் பொறுப்புடனும் தொடர்ந்து பணியாற்ற வேண்டும் என்றும் அவர் அறிவுறுத்தினார். சிறப்பாக செயல்படும் காவல்துறையினரின் சேவையை அங்கீகரித்து ஊக்குவிக்கும் வகையில் இதுபோன்ற பாராட்டுகள் வழங்கப்படுவது, மற்ற காவலர்களுக்கும் ஊக்கமளிக்கும் என்று அவர் தெரிவித்தார்.
